GUMIKAN sa daghan kaayong mga reklamo kabahin niining paghatag og cash o kuwarta nga ayuda sa mga kabus sama sa unconditional cash transfer (UCT) ug sa Social Amelioration Program (SAP), labi pa ning panahon sa pandemya, nakahuna-huna na lang si Gov. Gwen Garcia nga ‘in kind’ o pagkaon na lang ang ihatag inay cash.

Magkagubot sa paghinatagay. Unya ang uban dili gamiton sa insaktong pamaagi kay giinom, gisugal o gipalit og drugas sa uban. Mao nga misugyot si Gov. Garcia nga ‘in kind’ na lang. Bugas ug de lata. Hatagan og kupon ang nga beneficiaries, unya ipa-claim o kuhaon sa tindahan.

Maayo kaha nga kini na lang ang sagupon sa gobiyerno? Maayo gyud tong kuwarta o cash kay aron makapili ang mga beneficiaries unsay paliton.

Ang usa sa labing datu sa tibuok kalibutan nga si Bill Gates nagkanayon; ‘Charity must look at the need and not on the cause. O kon atong Binisay-on, kini nagpasabot nga ang buhat sa kalooy kinahanglan motutok sa unsay gikinahanglan ug dili sa unsay hinungdan.

Ang katarungan ngano nga duna kitay gobiyerno mao nga kini ang gisaligan sa katawhan nga motrabaho sa pagpanalipod unsay i-kaayo sa katawhan. Ang pagtabang sa gobiyerno sa katawhan ning panahon sa krisis dili angay tawgon nga buhat sa kaluoy kon dili usa kini ka obligasyon.

Ug dili mahimo nga lahapon sa gobiyerno pag- ila o but-an niya ang paghukom sa unsay gikinahanglan sa katawhan. Dili mahimo nga sukdon niya sa iyang kaugalingong metrosan ang lahi nga kahimtang ug mas makaluluoy nga situwasyon sa mga magbubuhis nga mao ang nagbuhi kanilang taga gobiyerno. (bobbygnalzaro@gmail.com)