SI KONSEHAL Raul “Yayoy” Alcoseba sa Bando Osmena Pundok Kauswagan (BOPK) nangamahan og ordinansahon nga maghatag og libre sa mga gamit sa kababayen-an kon moabot ang ilang “monthly period” sama sa napkin ug tampons. Kay matod ni Yayoy, kini basic human right alang sa kababayen-an sama sa limpiyo nga tubig mainom ug pagkaon. Kini alang lang niadtong “indigents” nga kababayen-an nga dili maka-aff ord sa pagpalit gumikan sa kawad-on. Gihatagan og gibug-aton ni Alcoseba ang dignidad sa kababayen-an kon moabot ang monthly period.

Kining tinguha sa pagpanghatag og libre nga mga gamit sa kababayen-an alang sa ilang binuwan nga bisita, makapahinumdom kanato niadtong nag-viral sa social media nga kontrobersiya. Diin usa ka barangay tanod nagbalik-balik sa pag-lecture sa usa ka Grab delivery driver nga dili “essential ang lugaw.”

Matod pa sa tanod nga dili mamatay ang usa ka tawo kon dili makakaon og lugaw.

Tingali kon ang sukdanan niadtong maong opisyal ang atong subayon, dili usab essential” ang sanitary napkin para sa kababayen-an. Walay mamatay nga babaye kon dili mabutangan og napkin kon moabot ang iyang binuwan nga bisita.

Ning panahon sa krisis, halos natingob ang atong pagtagad diha lang sa mga pagkaon-on ug tambal nga maoy nag-unang panginahanglan sa katawhan.

Nganong dili man lang medisina, vitamins o food supplement ang ipanghatag ni Yayoy?

Dignidad

Nakapasamot kini sa kalisdanan sa kababayen-an ning panahon sa pandemiya. Kay lahi sa kalalakin-an, anaa silay lahi nga panginahanglan ilabi na og moabot ang ilang binuwan nga bisita. Panginahanglan nga lisud sabton sa kalalakin-an.

Apan alang sa kababayen-an, dako’g bili sa ilang kadungganan. Kanang butang gitawag nato’g menstrual needs nga kon dili nila atimanon, magnodnod kanila sa kauwawan.

Mao kanay atong nakalimtan. Kadungganan ug dignidad. Atong gikalimtan

nga dili lang pagkaon ang atong gikinahanglan aron kita mabuhi. Nanginahanglan sad kita sa gitawag og dignidad.

Kay ang usa ka tawo nga way ikapasigarbo nga dignidad nahisama na lang sa usa ka patay’ng buhi. (bobbygnalzaro@gmail.com)