Si anhing Senador Raul Manglapus nakahuna-huna kaniadto sa pagpasar og balaudnon nga mag-dili o nag-ban sa pista. Kay kini laging binuhatan sa uban nga mangutang o manghuwam og kuwarta unya gamiton lang sa paghikay o kumbira aron ipakaon sa mga tawo. Unya pagkahuman, magbaguod og bayad sa utang. Pero gitambagan si Manglapus sa iyang adviser nga dili ihinayon ang iyang balaudnon kay siguradong ang mga Bol-anon dili mobutar na niya. Zerohan siya sa Bohol inig eleksiyon.

Nahibawo naman mo nga “big deal” gyud nang pista sa mga Bol-anon. Karon laging buwan sa Mayo, maghilak ang adlaw sa Bohol kon way pista. Unya bisan asa na sila nga suok sa kalibutan, manguli nang mga Bol-anon aron lang mamista. Niadtong miaging semana, mimando si Presidente Duterte nga likayan una ang pagpahigayon og pista aron malikay usab sa tinakdanay sa Covid-19. Pero wala motuman ang uban kay naghikay gihapon. Hinuon, ang paghikay wala gidili, ang tapok-tapok ra.

Okey ra mag-ihaw gihapon og baboy o kabaw pero dili lang mangimbitar og mga bisita. Way kalihukan sa simbahan sama sa misa, prosesyon ug mga kalingawan. Kini gong pista, isip pasalamat ra man ni sa grasya nga atong nadawat ngadto sa patron o Ginuo. Kay kitang nagsagop sa Simbahang Romano Katoliko, matuhu-tuhuon man. Apil na man kini sa atong kultura ug tinuhuan. Bisan ang New People’s Army (NPA) sa Bohol dili motuo og santos ug Ginuo apan kusog kaayong mamista.

Kini gong tinuhuan lisod na kaayong wagtangon. Migamot nag-maayo ug lisud hunungon. Ang atong nasud gi-ila nga usa sa kinabag-ang magtutoo ni Kristo ug atong napamatud-an ilabi na sa panahon sa kalisdanan ug mga krisis nga mas misamot pa kabagtok ug kahugot sa atong pagtuo.

Ikaduhang tuig karon nga gilab-angan nato ang importanteng mga kalihukan sa simbahan sama sa mga pista. Mas naluya ug nahugno ba ang mga Kristiyanos gumikan sa kakulian nga atong gisagubang nunot niining pandemiya? Wala. Mas nakita pa gani hinuon nato karon ang paglipang sa atong pagtuo kay ang atong pagtuo sa Diyos mao ang nakahiusa kanato ug tinubdan sa paglaum. (bobbygnalzaro@gmail.com)