MATAPUS na ang mga malipayong adlaw sa mga estambay nga mahilig mag-inum-inum diha daplin sa kalsada. Kini gumikan kay hingusgan na sa kapulisan ang kampanya sa paggukod niining mga estambay nga mag-inum daplin sa dalan. Kini nunot usab sa bag-ong kamanduan ni Presidente Rodrigo Duterte. Ang rason sa Presidente nga badlungon o pangdakpon ang mag-estambay nga mag-inum sa daplin sa dalan gumikan kay mao kini ang tinubdan sa away o krimen.

Tinuod bitaw. Kay kining mga estambay nga walay lingaw maoy mangita og gubot. Maoy mamaregla sa mga tawo bisan walay sala. Kana lang motabis o motan-aw nila, ila dayon nga pareglahan. Mao usab kini ang tinubdan sa extortion. Ang mga mangagi, kilkilan pa sa mga bugoy sa maong lugar para ipalit og dugang ilimnon. Ang ubang mga estambay, anha ra usa maglaroy-laroy diha sa komunidad nga maoy tinubdan sa illegal nga drugas.

Didto sa dakbayan sa Davao, una na kining gi-implementar ni kanhi Mayor Duterte. Wala gyud kay makit-an nga mga estambay nga mag-inum daplin sa dalan. Hugot kining gipatuman sa kapulisan didto sama usab sa pag-implementar sa smoking ban sa mga public places ug pagpasira sa mga bars ug imnanan sa alas dose sa tungang gabii. Kadtong magsuroy-suroy matag gabii, sitahon sa kapulisan.

Gibutyag ni PNP chief Director General Oscar Albayalde atol sa iyang pagbisita dinhi sa Cebu niadtong miaging semana, nga ila kining hingusgan. Ila unang badlungon ang mga estambay sa unang violation. Kon dili patuo, ila nang dakpon ug pasakaan og kasong vagrancy nga nagtangag og multa. Pareho anang mga babayeng mugbog lupad nga naa mag-atang og mga kustomer diha daplin sa dalan. Dakpon intawon na sila og pasakaan og kasong vagrancy.

Maayo baya kining maong paagi aron madisiplina kay morag mo-abuso na pod kaayo ang uban. Anha sila mag-inum sa mga agi-anan unya maghukas pakita anang ilang patik. Mangahadlok pod nang ubang nga tawo. Kon hugtanon kining i-implementar posibleng mokunhod ang krimen ani.

(bobbygnalzaro@gmail.com)