AMBOT kon nganong na-phobia man ang duha ka mga opisyal ning dakbayan sa atong kapulisan ning panahon sa kampaniya? Bisan man gani ang pagmuntar og police checkpoint duol sa iyang panimalay sa Guadalupe, gi-kuwestiyon naman sa ‘kanhi laos nga pulitiko’ nga unta makaayo man kini kaniya ug sa iyang pamilya. Gipasanginlan pa man gani ang kapulisan nga maoy nagpaluyo aning pagpangrakrak sa mga panimalay sa iyang kaalyado nga mga kapitan sa mga bukirang barangay.

Ang iyang running mate nga babayeng konsihal, mipabuhagay sa iyang kasagmuyo usab ngadto sa kapulisan atol sa iyang privilege speech sa sesyon sa konsiho niadtong miaging adlaw. Iyang gipasanginlan ang kapulisan nga mihimo og terorismo sa ilang mga supporter ngadto sa kabukiran. Wala ra bay ebedensiya nga gi-presentar aron magsuporta sa iyang pasangil.

Sa dihang nahitabo ang pagpangrakrak sa mga panimalay sa duha ka kapitan sa kabukiran niadtong Abril 5, ang ‘kanhi laos nga pulitiko’ dali kaayong nakatumbok nga ‘politically motivated’ ang maong hitabo. Kon maghisgot god ta og ‘politically motivated’ wala man tay laing matumbok kon dili ang iyang kaatbang sa pulitika nga si Vice Mayor Edgardo Labella. Nagtuo kaha mo nga mahimo na ni Labella? Imposible. Gihatagan og ultimatum sa ‘kanhi laos nga pulitiko’ ang kapulisan og napulo ka adlaw sa pagsulbad sa maong hitabo sa duha ka mga barangay kapitan nga iyang kaalyado kay kon dili masulbad, iyang pasanginlan ug gitumbok ang kapulisan nga maoy nagpaluyo niini. Karon, milapas na ang napulo ka adlaw, unsa na may kalambuan? Wala.

Nganong na-phobia man kini sila sa kapulisan? Kinsa may nakigkontra sa mga pulis? Gigamit na diay ang mga pulis isip goons sa ilang mga kontra sa pulitika? Hadlok sila sa kapulisan kay ang mga opisyal niini labi pa ang Cebu City Police Office chief dili na nila makontrolar? Sa una lagi, sila may migamit sa kapulisan aron maoy nanghulga sa ilang mga kontra sa pulitika sa kabukiran. Mao lagi ni ang gi-ingon nga ‘weder-weder lang’. (bobbygnalzaro@gmail.com)