AMBOT kon natayming ba lang o coincidence nga sa pagmando ni Presidente Duterte ngadto sa Criminal Investigation and Detection Group (CIDG) ug sa National Bureau of Investigation (NBI) nga ipasira ang mga buhatan sa Kabus Padatoon (Kapa) Community Ministry International Inc., niadtong Hunyo 8, sa kadlawaon nianang maong adlaw, gitulis ang ilang buhatan nga nahimutang sa Poblacion, Compostela, Cebu.

Gibana-bana nga P28 milyones ang nadagit sa mga armadong mga tawo nga misulod og miransak sa ilang buhatan ug gibuksan ang vault nga gisudlan sa dakong salapi. Siguro contribution na kadto sa mga miyembro. Gisuwayan pa pagsunog ang ilang buhatan.

Gihimo ni Duterte ang maong kamanduan sa dihang nahinabi siya ni Pastor Apollo Quiboloy sa TV program sa pastor didto sa Davao City. Gi-warningan ni Duterte ang mga tawo nga dili dayon ma-engganyo sa pag-invest sa Kapa sa ilang kuwarta kay dako kining binoang. Tiaw pa nimo nang uli-an ka sa imong investment og 30 porsento matag buwan. Walay bangko nga mohatag nianang maong percentage bisan pa ang Central Bank, matod pa sa Presidente.

Maayo lang kuno kini sa sinugdanan ug sa mga naka-una. Ang Kapa nabaniog na kini sa tibuok nasud gumikan lagi sa kataas og kadako sa percentage nga i-uli sa miyembro base usab sa investment. Kon mo-invest kag P100,000 ulian ka sa gitawag nilag “gift of love” nga balig P30 mil matag buwan. Forever pa.

Daghan na ang mi-invest og nalipay ang tanan. Wala pa may reklamo sa pagkakakaron.

Usa ka Pastor Joel Apolinario Jr., ang founder niini og didto kini magsugod sa Bislig, Surigao og dayon mikatap sa Mindanao og karon tibuok Pilipinas na. Too good to be true and double your money scheme.

Aw, wala man tay katungod nga mobabag sa gustong mo-invest kay ila man kanang kuwarta. Naa ra nila kon maminaw ba sila o dili sa mga pahimangno. Ma-ilhan ra bitaw na og dako ning ilad kay daghan naman unya ang mga moreklamo sa kaulahian. Anha ra ta mopikat nila kon mabiktima na sila. (bobbygnalzaro@gmail.com)