KON sa boxer pa ni nga taga Dalaguete; bisan asa lingi, pite; bisan asa sandig, pise. Maayo pay muligid. Mao kini ang akong paghulagway ni retired police general ug karon Daanbantayan Mayor Vicente Loot. Wala gihapon maka-eskapo si Loot sa paghinumdom kaniya ni Presidente Rodrigo Duterte atol sa pagbisita niini dinhi sa Sugbo sa miaging Sabado ug Domingo. Gibanatan gihapon ang mayor ug gibalikas pa sa Presidente.

Dakong kauwawan kining nahitabo ni Loot. Dili lang kaniya personal kon dili apil na usab ang iyang pamilya. Ambot kon kanus-a pa kaha mahuman kining iyang kalbaryo nga gipas-an. Wala man usab siya kahatagi og kahigayonan nga malimpyohan ang iyang pangalan o mapasakai og kaso.

Nagbaha matod pa ang drugas sa panimalay ni Loot. Usa kuno sa kuwarto sa iyang pinamalay, napuno sa drugas. Siguro makatuo kita kay Presidente na god ang nagbutyag. Kini pinasikad sa intelligence report nga nadawat sa pamuno nasud. Apan kon tinuod man gani kini, nganong wala man aksiyoni sa mga tinugyanan sa balaod pinaagi sa pag-apply og search warrant.

Gipangutana pa sa Presidente atol sa iyang pagpamulong sa fiesta sa Tabogon kon buhi pa ba si Loot og dayon balikas.

Aduna kahay kalambigitan ang gobiyerno niadtong nahitabong pagpangrakrak ni Loot apil ang iyang pamilya? Ug kon binuhatan man kadto sa mga government agents, nganong wala na man lang nila gyud tiwasi si Loot?

Hangtud kanus-a man mag-antos si Loot niining krus nga iyang gipas-an sa pagkakaron? Mabuhi kaha kini si Loot hangtod nga matapus ang termino ni Presidente Duterte nunot sa hulga sa Presidente nga iyang puohon ang mga nahilambigit sa illegal nga drugas? Atong atangan ang mosunod nga nga panghitabo.

(bobbygnalzaro@gmail.com)