KANIADTO apil sa akong pag-ampo si boxing champion Manny “Pacman” Pacquiao kon aduna siyay away. Apan miabot na ang panahon nga wala na ako ganahi ni Pacman kay tan-aw nako morag panguwarta na lang ang iyang mga away. Labi pa kadtog sunod-sunod niyang kapildihan. Gusto naman gani unta nako nga mo-retiro na si Manny.

Sa iyang kapildihan ni Austrilian boxer Jeff Horn niadtong miaging tuig, akong na-oberbahan nga hinay na ang mga lihok ni Manny. Gumikan kaha sa iyang edad. Mas batan-on si Horn niya. Apan lahi usab og inayawan si Horn kay manggakos man. Mao nga dili makabuylo si Pacman sa iyang kusog nga mga suntok.

Apan niadtong Domingo sa away nila ni Argentinian boxer Lucas Matthysse sa World Boxing Association (WBA) welterwieght world champion didto sa Malaysia, lahi nga Manny ang atong nasaksihan. Limpiyo og inayawan si Matthysse og modistansiya siya ni Manny mao nga nakabuylo pag-release si Pacman sa iyang kusog nga mga suntok.

Gipakamang niya ang Argentinian fighter sa third round. Gisundan kini sa fifth round nga diin iya na usab nga gipaluhod. Ug ang final blow mao ang sa round seven. Human mihulod si Matthysse gipahunong na sa referree ang away. Nalangkat si Pacman ang maong bakus nga nakapadugang sa iyang gipanghuptan nga mga titulo sa nagkalain-laing divisions.

Para nako morag okey pa og laing usa o duha ka away si Manny. Kusgan pa siya og anaa pa ang iyang kusog. Pero mas maayo usab nga seryosohon niya ang mga tambag sa iyang mga higala apil na si Presidente Rodrigo Duterte. Mitambag si Duterte mga gikinahanglan mga moretiro na si Manny ug panahon nga iyang i-enjoy ang iyang kuwarta. Tinuod, wala nay angayan pang i-pruweba si Manny. Naa na niya ang tanan, kuwarta, dungog ug popularidad. Ang kuyaw god og mapuruhan siya og ma-disable. Aw, daghan ang mamintana ni Jinky.

(bobbygnalzaro@gmail.com)