MIABOT na niadtong Dominggo sa hapon ang unang hugna sa mga bakuna nga gidonar sa China. Mismo si Presidente Rodrigo Duterte nisugat niini sa Villamor Air Base nga sakay sa usa ka Chinese military airplane. Ang mga bakuna nga mokabat ngadto sa 600,000 doses nga CoronaVac vaccine nga hinimo sa Sinovac Biotech Ltd., sa China. (Ayaw mo kalibog ha, Sinovac ang kompaniya.)

Ang CoronaVac mao ang ikatulo nga bakuna nga giangkat sa Pilipinas batok sa Covid 19. Miangkat usab ang kagamhanan sa Pfizer-BioNtech ug AstraZeneca ug na-isyuhan na kini og emergency utilization authority (EUA) sa Food and Drug Administration (FDA). Buot ipasabot nga legal na ang pagpasulod niini dinhi sa nasud, puwede nang itusok sa katawhan.

Sa iyang pamahayag, gipasalamatan ni Duterte ang kagamhanan sa China gumikan sa donasyon. Matod sa Presidente nga pinangga kita sa China kay ang ubang nasud nga gihatagan usab sa China, gikuha gyud nila sa China. Apan ang atong donasyon gihatud gyud dinhi sa China. Iyang giawhag ang katawhan nga magpabakuna ug di angay mabalaka. Ug kay dili man mabakunahan ang tanan, iyang giawhag gihapon ang katawhan, labi pa kadtong dili pa mabakunahan, nga mosagop gihapon sa safety health protocol.

Nanghinaot ang Presidente nga kining maong mga bakuna mao na ang makasulbad sa problema sa pandemya nga mi-igo sa nasud sulod na sa usa ka tuig. Matod pa sa Presidente nga dili angay nga mabalaka ang katawhan aning negative nga mga taho kabahin sa bakuna kay hinimo pinaagi sa scientific method sa mga expert. Matod pa sa mga expert nga ang Sinovac aduna lay 50.4 efficacy o ka epektibo nga bakuna.

Unang mabakunahan mao ang mga frontliner. Apan adunay nagkanayon nga dili kini epektibo alang sa mga frontliner gumikan sa efficacy rate. Sa yanong pagkasulti, dili kini makahatag og proteksiyon sa mga frontliner nga exposed sa mga natakbuyan sa Covid. Aduna poy niingon nga ang pagpabakuna di garantiya nga makahatag og proteksiyon nga dili na matakbuyan ang usa ka tawo sa Covid.

Huwat lang ta sa epekto niini. Basin mao na ni ang maghatag og dalan nga mobalik na sa normal ang atong kinabuhi.