HUMAN sa napulo ka tuig nga paghusay, nakakab-ot og hustisya ang mga kabanay sa 58 ka mga biktima sa brutal nga pulitikanhong bayolenteng krimen sa nasud. Sa dihang nahitabo ang niluog nga krimen ug gisugdan ang husay, daghan ang nag-ingon nga molanat pa og pipila ka dekada o maabtan pag-siyam-siyam ang husay gumikan sa kadaghan sa mga akusado. Mokabat ngadto sa 101 ang gipangkiha. Kadaghanan loyal nga supporters sa gamhanan ug inpluwensiyadong banay’ng Ampatuan sa Maguindanao. Dihay mga sakop sa Philippine National Police (PNP).

Apan nasayop sila gumikan kay mikabat lang sa napulo ka tuig ang husay. Niadtong miaging adlaw gipakanaug ang hukom sa sala ni Quezon City Regional Trial Court (RTC) Judge Jocelyn Solis-Reyes diin ang mga sakop sa Ampatuan family nga mga mastermind nakombikto. Inay adto husayon sa Maguindanao ang kaso diin didto nahitabo ang krimen, ang Korte Suprema midesisyon nga adto sa kauluhan ipahigayon alang sa siguridad sa mga saksi ug mga private ug public prosecutors ug huwes. Lisud og didto sa Maguindanao ipahigayon ang husay kay posibleng mamiligro ang kinabuhi sa mga saksi ug mga kabanay sa mga biktima.

Gani, samtang nagpadayon ang husay, adunay ubang mga saksi nga misteryosong nangahanaw samtang adunay mga kabanay sa mga biktima ang mi-atras ug ang uban gipamatay. Sa 58 ka mga biktima, 32 niini ang mga sakop sa media, kasagaran taga General Santos City.

Kadaghanan sa mga biktima supporters ug kabanay ni Ismael ‘Toto’ Mangudadatu. Mikuyog sila sa convoy kang Mangudadatu nga mo-file sa iyang certificate of candidacy sa pagka-gobernador sa Maguindanao batok sa mga Ampatuan sa dihang gihunong ang ilang nga sakyanan sa sitio Masalay, barangay Saman, lungsod sa Ampatuan, Maguindanao province niadtong November 23, 2009 sa mga tawo ni Andal Ampatuan Sr. Si Datu Unsay Mayor Andal Ampatuan Jr., maoy nangulo sa krimen. Namatay si Andal Ampatuan Sr., sulod sa bilangguan samtang nagpadayon ang husay. Di tanan sa 101 ka mga akusado nakombikto. Sa katapusan, nakab-ot ang tam-is nga hustisya. (bobbygnalzaro@gmail.com)