NGANONG ang mga senador gusto man mahimong Senate president? Gawas sa garbo ug gahum sa Senate president sa kalihukan sa mga senador ako nagtuo nga adunay mas taas pa nga agenda ang mga buot mag-Senate president. Sa pagka-karon miguwa na ang ngan ni re-elected Senator Cynthia Villar nga interesado nga mag-senate president. Kaniadto murag siguro na man to nga si Senate President Tito Sotto magpadayon sa maong pwesto. Nagtuo ako nga buot ni Senator Villar nga ipakita ang mas lig-on niyang personalidad aron makunsiderar siya nga presidential timber kay nag-una gud siya sa mga kandidato pagka-senador niadtong milabay’ng eleksiyon. Unya nganong si Sen. Manny Pacquiao man ang mihangyo kang Sen. Ping Lacson nga maghimug resolusyon nga pirmahan sa mga senador nga mosuporta kang Senate President Tito Sotto? Sayud sila nga si Sotto walay presidential ambition. Nahadlok tingali sila nga kon mapiling Senate president nga matintal si Villar pagdagan pagka-presidente. Ang iyang bana, kanhi senador Manny Villar, milansar sa pagka-presidente kaniadto apan naparut. Kinsa may makasanta kang Sen. Villar sa pag-itsa sa iyang kawo sa presidential derby? Si Lacson gituhoan nga maoy modagan sa pagka-presidente sunod eleksiyon ug bise presidente si Pacquiao. Kahinumduman nga si Lacson midagan usab sa pagka-presidente apan napildi. Nagtuo ang iyang mga supporter nga tungod sa iyang advocacy nga anti-drugs apil na ang extra-judicial killing ug anti-corruption nga siya maoy angay nga mopuli kang Pres. Duterte.

Apan dili pa masiguro kon si kinsa gyud ang mapili nga Senate president sa 18th Congress nga magsugod karong Hulyo 22. Sa pagka-karon anaa nay 13 ka mga senador nga mipirma pabor sa pagpadayon ni Senate President Sotto. Apan ang tulo, Chiz Escudero, Gringo Honasan ug Loren Legarda dili na mga senador sa Hulyo 22. Sa ato pa 10 nalang ang mahabilin kang Sotto. Unya kay kinahanglan man og 13 ka mga senador labing minus aron mahimong Senate president, si kinsa man sa mga senador ang mopaluyo kaniya? Daghan pa kaayong mahitabo gikan karon hangtud sa Hulyo 22 nga maoy adlaw sa pagpili og Senate president, protempore, majority floor leader ug mga committee chairman. Daku kaayo og matabang ang salapi ug ang itanyag nga chairmanship sa mga committee ngadto sa mga senador. Mao ni giingon nga positioning alang sa presidential election sa 2022. Mausab lang ang kamada kon usbon ang atong kontitusyon ngadto sa pagka federal-presidential diin mahimo na usab nga makadagan og laing termino si Presidente Duterte.

•••

Gubot usab ang kahimtang sa pulitika dinhi sa Sugbo. Kining panagbangi nila ni Vice Mayor-elect Mike Rama ug Presidential Assistant for the Visayas Mike Dino moresulta sa pag-aslum usab sa relasyon unya nila ni Rama ug Mayor-elect Edgar Labella, nga suod ni Dino. Nagtuo usab ang mga political observer nga si Rama maoy gustong maghawod-hawod sa city hall apan dili kini tugotan ni Labella. (mannyrabacal1144@gmail.com)