BULAN na sa Disyembre. Morag nisutoy lang ang tuig sa 2020 nga wa nato damha. Di nato makalimtan ang 2020 nga nagdala’g tigaw sa ato kinabuhi tungod sa Covid-19.

Daghan ang nawala ug daghan nga nausab sa atong kinabuhi. Luoy kaayo ang mga kabataan nga daw napriso tungod kay di na nila makahalobilo ang ilang mga klasmeyt ug mga higala.

Hasta ang mga senior citizens nga may gibating sakit kay gipugngan sab nga makaguwa. In short, wala na ang “social life,” ilabi na sa panahon sa pagsaulog sa adlaw’ng natawhan, kapistahan ug bisan karong pasko.

Mohaum ang kanta nga “Ang Disyembre ko ay malungkot, dahil may Covid pa.” Di pud nato mabasol ang atong mga opisyal sa gobyerno ug mga hanas sa medisina nga magpahamtang og “lockdown” ug kurintinas sa mga lugar nga naapektohan sa pandemic kay usa ang Pilipinas sa may pinakadaghan nga natakdan.

Nahimo pang “highest pointer” ang Davao City, busa bisan unsa na lang Executive Order ang gipaguwa ni Mayor Inday Sara aron makunhuran ang magtaas sa ihap dinhi.

Gahi daw ang ulo sa taga Davao mao nga kinahanglang estriktuhon ang pagpahamtang sa nga palisiya sa panglawas dinhi. Naa puy nag-ingon sa social media nga taga Luzon nga abi nila’g dili matakdan ang taga Davao kay mga astig sama ka astig ni Pangulong Rody Duterte.

Sa pagkatinuod, walay maayong laki sa Covid-19 tungod kay kung hinay ang imong resistensya ug “immune system” seguradong sa pugon de crematorium ang imong padulngan. Bisan gani ang mga tawong maayo’g resistensya kay magrabihan sab sama sa mga doktor ug nurses nga nag-atiman sa mga masakiton.

Ayaw’g ingna nga kulang sa bitamina ug masakiton ang mga “medical frontliners” kay dunay nangamatay nga batan-on ug baskog pa. Gawas niini, dako sab ang epekto sa pagsabot nato sa sakit. Duna nay “phobia” o kahadlok bisan dili tinuod.

Karon, kung may ordinaryong trangkaso ka o flu kay ingon dayon nga Covid-19 og dapat magpa-swab na. Halos tanang namatay nga atong madunggan kay ipahid gidayon sa Covid nga daw mao na lang kini ang sakit sa katilingban.

Dili nato makalimtan nga daghan pang mga sakit nga mas grabe pa ka “deadly” kaysa Covid sama sa dengue, TB, chicken pox, ordinaryo nga flu, polio, ug uban pa nga motakboy ilabi na sa mga kabataan.

Mao gani nga gipadayon karon sa Department of Health ang pagbakuna sa kabataan sa tibuok Pilipinas samtang anaa pa ang Covid. Abi tingali nato nga nihunong ang ubang virus ug bacteria sa paglipang karon nga may Covid.

Akoa diay ipadangat ang among pahisubo sa kamatayon sa among sister-in law nga si Vangie Onofre Roldan nga kapikas ni DILG-XI Regional Director Alex Roldan. Wala siya namatay sa Covid kondili sa kumplikasyon sa iyang kidney human sa sobra 10 ka tuig nga dialysis.

Duna silay lima ka anak nga puros lalaki nga si Luan, Royroy, Laklak, Nipnip, ug AE. Tingali kung wa masayri nga namatay kini sa iyang sakit sa kidney ingon dayon nga namatay siya sa Covid. Busa amping ta kanunay bai!