Patay ang usa ka street sweeper sa Cebu City human gipusil alas 2:00 sa kaadlawon Martes, Enero 9, 2024 sa N. Bacalso Avenue, Brgy. Bulacao, dakbayan sa Sugbo.

Ang biktima giila nga si Ronnie Abregundo, 57, minyo, taga Sityo Cabangcalan 1, Barangay Bulacao, Cebu City, street sweeper nga nadestino sa Department of Public Services (DPS) sa Kagamhanan sa Dakbayan sa Sugbo.

Base sa imbestigasyon sa Inayawan Police Station ubos sa kamanduan ni PMaj. Jeciree Basitao, paingon na unta mo-duty ang biktima nga nagmaneho sa iyang e-trike padulong sa downtown area.

Gikataho’ng gisundan si Abregundo sa duha ka mga gunman nga nagsakay og motorsiklo.

Pag-abot sa maong dapit, gipusil ang biktima nga nakaangkon og tulo ka mga samad pinusilan sa lawas ug duha sa iyang ulo nga maoy hinungdan sa iyang hinanaling kamatayon.

Giingong ang angkas sa motorsiklo nikanaug pa ug gitiwasan sa pagpusil ang nahagba na nga biktima.

Sa imbestigasyon sa kapulisan, ilang gituohan nga hayan dumot ang motibo sa pagpatay kang Abregundo nga giingong adunay nasilo kaniya ilabi na nga magmaoy sa higayon nga mahubog.

Nasubay sab sa imbestigador nga adunay gikaaway ang biktima.

Nitumaw sab ang matod pa nga kusog mamadlong ang biktima sa mga silingan nga magsaba-saba ilabi na niadtong mag-videoke sa lawom na nga gabii.