COTABATO CITY -- Gisulod sa isolation center sa Sanitarium Hospital sa Sultan Kudarat, Maguindanao Province ang napulo ka frontliners nga nakauban sa upat ka tawo nga nagpositibo sa coronavirus disease (Covid-19).

Sa napulo ka frontliners, upat niini mga sakop sa Rapid Emergency Action on Disaster Incidence (Readi) sa Bangsamoro Autonomous Region in Muslim Mindanao (Barmm).

Sila ang nag-atiman sa upat ka Locally Stranded Individual (LSIs) gikan sa probinsiya sa Lanao del Sur nga nagpositibo sab sa sakit.

Matud ni Ministry of Interior and Local Government (MILG) Minister ug Barmm Readi head Naguib Sinarimbo nga bisan maayo ang kondisyon sa upat ka LSI ug mga asymptomatic kini, mas gusto sa mga frontliners nga maseguro nila ang kaluwasan sa ilang mga kauban sa trabaho ug pamilya.

Niadtong nakalabay nga semana, gikuhaan og swab samples ang upat ka LSI ug nagpositibo sa RT-PCR Test sa Covid-19.

Samtang gihulat na lamang sa mga frontliners ang resulta sa ilang RT-PCR Test.

Una nang gibutyag ni Inter-Agency Task Force on Covid 19 Spokesman Asnin Pendatun nga misaka na sa 190 ang natala nga Covid-19 positive case sa Bangsamoro Region.

Sa kasamtangan, gipaspasan pa sa Bangsamoro Government ang contact tracing ug hugtanon nga pagpatuman sa mga health protocols batok sa makamatay nga sakit. (Edgar E. Fuerzas)