BANSALAN, Davao del Sur -- Gipatagam sa mga awtoridad ang napulo ka mga indibiduwal nga nadakpan tungod sa paglapas sa minimum protocols batok sa Covid-19 sa lungsod.

Sa taho sa Bansalan Municipal Police Station (MPS), ang 10 giisyohan og citation ticket niadtong Martes.

Sumala sa kapulisan sa Bansalan MPS nga adunay direktiba si Davao del Sur Police Provincial Office Director Alberto Lupaz nga ipatuman ang pagpanakop sa mga malapason sa health security measures aron kapugngan ang pagkatap sa makamatay'ng sakit.

Usa sa mga gisupak sa mga indibidwal mao ang pag-adto sa mga pampublikong lugar nga wa magsul-ob og face mask.

Sa datos sa Municipal Inter-agency Task Force, duha na sab ka bag-ong kaso ang natala sa buhatan, hinungdan nga misipa na sa 70 ang nagka-Covid-19 sa lugar.

Sa maong ihap, 38 niini nakarekober na ug 32 pa ang aktibo ug laing unom mga suspek ug gimonitor. (Orlando B. Dinoy)