DIGOS CITY -- Napusgay ang linghod nga kaputli ug kaugmaon sa usa ka 12-anyos nga babaye human gitabanga'g lugos sa duha ka wa mailhing suspek, alas 7 sa gabii, Dominggo.

Sa imbestigasyon sa Women and Child Protection Desk (WCPD) nasayran nga si alyas Inday, molupyo sa Barangay San Miguel ning siyudad, nagbaklay niadtong higayona sa dalang Mabini Extension, padung sa balay sa iyang higala.

Sumala sa WCPD, kalit mihunong ang usa ka traysikel nga adunay laing sakay ug pulos nakabangot apil ang drayber.

Way daghang rason nga gipugos pagpasakay ang biktima ug gidala sa sagbutang bahin sa abandonadong luna likod sa simbahan sa Iglesia Ni Cristo sa Barangay Tres de Mayo.

Paghidangat sa lugar, gihimo na sa mga suspek ang linuog nga krimen ug milampos gyud kini sa pagpanamastamas sa biktima.

Human ang paglugos, gipasakay og balik ang biktima sa traysikel ug gibilin sa kanto sa dalang Sugar Road ug Mabini Extension ug paspas nga misutoy pagpadagan padung sa wa matinong direksiyon ang mga suspek.

Wa makuha sa biktima ang plaka sa traysikel hinungdan nga naglusad na ang kapulisan og lawom nga imbestigasyon aron matumbok ug mailhan ang mga suspek. (OBD)