GIBUTYAG ni Tagum City Mayor Allan Rellon nga dunay 13 ka mga money investment schemes sa Tagum City nga mikuha na og mga papeles sa ilang buhatan aron nga ma-legal.

Sa pakighinabi sa mga tigbalita kang Rellon, wala gisaysay niini ang pangalan sa trese ka mga money investment schemes, kon di iya lamang gipahibalo nga dunay 13 na kabuok ang mikuha og permit.

“In as far as Tagum, kini katong thirteen kabuok naay business permit kay naay cosmetics etc., to comply the requirements. Other activities, kanang pay in, pay out wala man na sa permit. Mao tong amoa silang gipatawag, gipangutana kung unsa gyud ang ilang business, so mao to amoa sab nga gi-note kung unsa, statement sab na nila,” ingon ni Rellon.

Giangkon niini nga usa siya ka networker, ug gipasabot nga mahagba gayud ang usa ka investment scheme ugaling walay laing gikuhaan sa ilang pundo.

“Tarong man gyud to..., pero wala gyud milahutay kay kung maundang ang distributor down the line, wala nay income, wala na sab kitay komisyon niini sa atong product nga gi-distribute, pero kini, iba man ni nga concept, mao gyud nga ato gyud ning palawman...,” ni Rellon.

Hinuon wala pa miluwat og pamahayag si Rellon human migula ang pamahayag ni Pangulo Rodrigo Duterte sa interview sa Sonshine Media Network International pinaagi ni Pastor Apollo Quiboloy labot sa mga money investment schemes. (Jeepy P. Compio)