TALANDUGON ang kahimtang sa usa ka 14-anyos nga batang babaye kinsa giingong miambak gikan sa ikaduhang andana sa gikonsiderang karaang shopping center kun Victoria Plaza sa Jose P. Laurel Avenue, Bajada Davao City Sabado sa hapon, Pebrero 23.

Sa impormasyon nga nakalap sa SuperBalita gikan sa kasaligan nga impormante kinsa anaa sa maong takna, gisaysay niini nga perte niyang hadloka sa pagkakita sa babaye nga nagbuy-od nalang sa salod sa ground floor.

Daling gitapuk-an ang dapit ug gilayong gikordon sa mga security guard ang lugar samtang gihulat ang paspas nga pag-responde sa Central 911.

Suma sa mga nakakita didto sa 2nd floor nga bahin sa shopping center, giingong ilang nakita ang 14-anyos nga miaksyon og tungtong sa puthaw nga ali ug alegasyong nag-selfie kini, dayon kalit nga nahulog.

Sa pakighinabi sa SuperBalita kang Sta. Ana Police Station, commander Chief Inspector Michael Uyanguren, giingon niini nga anaa na sa luwas nga kahimtang ang biktima.

“Yes, stable na iyang kahimtang naa karon sa SPMC,” ingon ni PCI Uyanguren.

Sa inisyal nga imbestigasyon sa kapulisan, giingong aksidente nga nahulog ang biktima gikan sa ikaduhang andana.

Samtang gisuwat kining maong balita, wala pa mipagula og opisyal nga pamahayag ang Victoria Plaza sa maong insidente.

Kahinumdoman nga gipangbutangan na og ali ang matag floor sa Gaisano Mall of Davao gumikan nailhan kini nga diha mangambak ang pipila nga gituohang nadepres sa kaugalingon. (Jeepy P. Compio)