ARON kapanalipdan ang katawhan ug mahatagan og proteksyon labi na sa hisgutanang money investment schemes karon sa Rehiyon 11, ang kapulisan sa Davao Region nanguna sa pagmugna og Inter-Agency Task Force, Mayo 31.

Kini aron batukan ang alegasyong mga “Fraudulent Financial Investment Schemes” kun pagpangilad lamang nga maayo lang sa sinugdanan, may “pay out” pa, apan magkadugay wala na, nga sagad giingong anaa sa Tagum City.

Ang maong kamugnaan gitunong sa 257th Regional Law Enforcement Coordinating Council (RLECC) Meeting nga gipangunahan sa Police Regional Office (PRO)-Davao.

Kauban sa kapulisan ang mga nagkadaiyang unit sa otoridad, ug mga nagkadaiyang buhatan sa gobyerno uban sa National Intelligence Coordinating Agency (NICA) ug Securities and Exchange Commission (SEC).

Nahimong chairperson sa maong Inter-Agency Task Force mao ang regional director sa SEC-11.

Migula sa pagpanubay sa otoridad nga dunay 53 ka mga financial companies ang nalambigit sa investment schemes ning rehiyon.

Sa pipila pa lamang ka adlaw nga operasyon sa otoridad, 14 na ka mga money investments schemes ang napaundang sa ilang operasyon.

Giingon hinuon nga mabalik ang ilang operasyon kung ilaha nang matuman ang mga resikitos sa gobyerno alang sa ilang legalidad.

Wala gipanganlan sa otoridad ang 14 ka mga nanirado sanglit nagpadayon ang ilang gihimong imbestigasyon ug pagpang-ronda.

Gipasalig hinuon sa SEC-11 ug sa otoridad nga ilang ipadayon ang ipa-monitor ug pagpahigayon og imbestigasyon sa maong mga nahisgutan sa pagpaneguro nga walay maalaot o mailad.

Giingon sa Inter-Agency Task Force nga daghan pa ang mosunod nga manirado nga mga money investment schemes nga resulta sa ilang mga lakang nga himuon ning mosunod nga mga adlaw sa Davao Region partikular sa Tagum City, Davao del Norte ug Davao del Sur.