DIGOS CITY -- Moihap sa 157 ka mga batang biktima sa linog ang nakadawat og pinaskuhan gikan kang Senador Christopher Lawrence “Bong” Go human gipaadto sa siyudad sa Davao niadtong Dominggo, Disyembre 29.

Ang mga bata gikan sa mga lungsod sa Sulop, Padada, Hagonoy, Magsaysay ug Matanao nga apil nahasol human nahitabo ang kusog nga sunod-sunod nga linog niadtong buwan sa Oktubre ug Disyembre 15.

Unang gipakaon og chicken meal lunch ang mga bata sa Gaisano Mall of Davao.

Mga batang nag-edad og 6 ngadto 10-anyos ang dyutay’ng nakalimot sa ilang nasinatiang trauma human nakakita sa pasundayag sa mga langgam didto sa Crocodile Park.

Human niini, gidala ni Go ang mga bata sa SM City Mall diin gipalitan og mga dulaan.

Sumala ni Mary Ann, 8-anyos, molupyo sa Matanao, Davao del Sur, kanunay na niyang madunggan ang ngalan ni Go apan wa kini masayod kun unsa ang posisyon nga senador.

Apan, miangkon nga dako ang iyang kalipay sa gidalit kanila sa maong opisyal.

Di sab malimtan ni Mary Ann ang nahitabo kanila human naguba ang ilang balay sa katapusang linog niadtong Disyembre 15.

Apil sab sa nakadawat og pinaskuhan ang Grade 6 nga si Sheila, molupyo sa Magsaysay, kinsa miangkon nga buot na niyang mobalik sa eskwela bisan nagpabilin ang kakulba sa dughan gumikan sa linog.

Ang kapin-gatus ka mga bata ang nakasinati og trauma human grabeng kadaot ang gihatod sa kusog mga linog dinhi sa lalawigan.