HUGTANON ang gihimong imbestigasyon sa kapulisan sa Panabo City Police Station kalabot sa duha ka gituohang "riding-in- tandem" nga nadakpan sa Purok 2, Barangay Maduao, Panabo City alas 9 sa buntag, Martes, Septiyembre 22, 2020.

Sa gihimong pakighinabi sa SunStar Superbalita, gikanayon ni Police Lieutenant Colonel Ernesto M. Gregore, chief of police sa Panabo City police, nga gihimo nila karon ang pagsubay sa matuod nga pagkatawo sa duha ka suspek kon tinuod ba ang nga mga "riding in tandem" ug kung duna ba silay kalambigitan sa sunod-sunod nga pagpamatay sa siyudad sa Tagum ug sa mga kasikbit nga dapit sa nahisgutang probinsiya.

Dugang pa nga gihimo sab sa Panabo City Police Station ang pagsubay sa mga kuha sa closed circuit television (CCTV) camera ug sa mga paghulagway sa mga gitudlong suspek sa sunod-sunod nga shooting incident sa siyudad.

Kasong paglapas sa Republic Act 10591 o Illegal Possession of Firearms ang isang-at batok kanila ni Bambi Sere, 26, ulitawo, ug Junrey Palen Payosing, 31, kanhi sakop sa Philippine Army nga pulos molupyo sa Purok 1, La Libertad, Sto. Tomas.

Mga nahisgutang naharang ug nadakpan sa gimuntar nga checkpoint sa kapulisan sa Panabo City Police Station, uban sa lain pang yunit sa kapulisan sa nahisgutang dapit.

Nakuha gikan kanila ang kalibre .45 nga pistola nga Colt MKIV nga dunay serial number 134402 ug kargado og pito ka mga buhing bala ug Caliber .3516 revolver nga kargado sab og unom ka mga buhing bala.