BALHOG sa Tagum City Police Station ang duha ka mga lalaki kinsa giingong notadong armado nga tigpayuhot og druga sa syudad.

Misangko ang operation sa Purok 3, Durian Avenue, Barangay Madaum alas 12:45 sa udto niadtong Sabado, Abril 6, nga malampusong pagkasikop nila Julkipli (bansagon gitago), 19-anyos, ug usa ka Edeto, 27-anyos, pulos nagpuyo sa Purok Ala-Uya, Barangay Binuangan, Maco Compostela Valley Province.

Nakuha sa posisyon sa mga dinakpan ang mga pakite sa gituohang shabu nga mokantidad og P12,000 ingon man mga armas nga walay lisensya nga dunay mga buhing bala.

Depensa sa mga dinakpan, nga ilang nahimo ang maong iligal nga buhat gumikan wala sila'y masudlan nga trabaho.

Nagpasalig ang kapulisan sa rehiyon nga sa mosunod pang mga adlaw, ila pa nga puhagon ang gagmay nga nagpayuhot og iligal nga druga aron mabutang na nga drug-free region ang Davao.

Giandam na ang posibleng kaso nga ipasa batok sa duha didto sa korte.