DAVAO OCCIDENTAL -- Duha ka mananagat ang gipangita karon sa Philippine Coast Guard (PCG) dihang kalit nahanaw atol sa ilang pagpalawod sa kadagatan sa Jose Abad Santos (JAS) niadtong Septyembre 11.

Sa tahong gipadala sa JAS-Municipal Disaster Risk Reduction and Management Council (MDRRMC) sa SunStar Superbalita Martes sa buntag, Septyembre 17, nailhan ang mga nahanaw nga sila si Antonio Malaki Jr., 30, minyo, ug Nalso Gapa, 45, ulitawo nga pulos molupyo sa Purok Aurora, Barangay Caburan Big sa lungsod.

Matud sa ig-agaw ni Brandon nga si Antonio, kalit nahanaw ang duha dihang nipalawod bisan sa dagkong balud nga hatud sa hanging habagat.

Unang nagpasidaan ang PCG nga di una mopalawod ang mga mananagat sa probinsiya tungod sa dagkong balud nga mikuso-kuso sa ilang kabaybayonan.

Gibutyag sab ni Roger Deloy, MDRRMC action officer sa lungsod, nga duha ka mga balay ang destroyed ug usa ang damaged dihang gihapak sa dagkong balud sanglit nahimutang kini kilid sa baybayon.

Dugang ni Deloy nga pipila ka mga pumpboat ang nadaut human giguba sa balud mao nga apektado sab ang panginabuhian sa mga mananagat.

Samtang si Mayor John Jason Joyce nagbutyag nga mihimo na sila og pagpanubay sa nahitabo aron mahatagan og tabang ang mga apektadong mananagat sa lugar.

Nanghinaut sab ang mayor nga makitang luwas ang duha ka nawalang mananagat. (Orlando B. Dinoy)