COTABATO CITY -- Mitaas pa ang ihap sa mga nagpositibo sa coronavirus disease (Covid-19) sa probinsiya sa Maguindanao.

Pinakaulahing nataptan mao ang usa ka Lieutenant Colonel ug Senior Master Sergeant nga sakop sa Regional Police Office sa Bangsamoro Autonomous Region in Muslim Mindanao (Barmm).

Kini mismo ang gibutyag ni Integrated Provincial Health Office (IPHO-Maguindanao) chief Dra. Elizabeth Samama.

Mga opisyal sa pulis nadestino sa PRO-Barmm headquarters sa Camp-SK Pindatun, Parang.

Matud ni Samama nga posibleng natakdan ang mga nahisgutan human magpasukod og uniporme sa sastre nga unang nagpositibo sa Covid-19 ug dunay travel sa Iligan City.

Hinuon, naa sa maayong kahimtang ang mga opisyal sa pulis gumikan kay asymptomatic ug naa sa isolation facility.

Laing 40 ka mga pulis nga giingong nagpasukod sab og uniporme sa maong sastre ang nag-negatibo sa Covid-19.

Kahinumdoman nga unang nagpositibo sa Covid ang general ug major sa Philippine Marines sa Barira. (Edgar E. Fuerzas)