MOKABAT sa 23 ka mga Dabawenyo ang nahimong kuwalipikado sa law assistance program ubos sa Educational Benefits System Unit (EBSU) sa City Government of Davao, ang pormal nga milagda sa ilang kontrata, niadtong Martes.

Sumala ni EBSU technical assistant Emilio Domingo, Jr. nga 20 sa law students makadawat og full scholarship, samtang ang laing tulo makadawat lamang og 50-percent scholarship grant.

Gituyo ang pagpalagda sa usa ka kontrata aron mapabilin ang ilang mga benepisyo ug kinahanglan sab nga mohatag sila sa kinahanglang mga requirements nga gilangkuban sa ilang “good grades” sa kolehiyo, certification gikan sa City Social Services and Development Office (CSSDO) nga nagpamatuod nga usa sila sa mga mas nanginahanglan.

Ang nahisgutang mga law scholars na-enrol sa mga tunghaan ning dakbayan sama sa Ateneo de Davao University, University of Mindanao, Jose Maria College ug Rizal Memorial Colleges.

Si Amir Essam Ibrahim, usa ka second year law student sa University of Mindanao, nagsulti nga usa ka dakong tabang kaniya ang iyang nadawat nga scholarship gikan sa LGU-Davao.

“I am so thankful to the city government for this opportunity because it can help people like me in realizing my dream to become a lawyer,” ingon ni Amir.

Bisan si Glazyle Gamy Aragon, usa ka working student nagpasalamat sa gumikan sa pinansyal nga tabang nga iyang ginadawat samtang katuon sa balaod.

“I feel so blessed that I qualified for the scholarship, especially so that I am a working student and I struggled to manage my studies and work. Now that I have the scholarship, it can help me make my dreams of becoming a lawyer come true,” ingon niya.

Dugang pa, nga full ug half tuition fee scholarship grants, ang ilang nadawat diin makadawat sab sila og tag P8,000 alang sa ilang book allowance.

Nasayran nga usa sa mga prayoridad sa Mayor Inday Sara Duterte sa iyang Byaheng DO30 agenda mao ang edukasyon.

Niadtong tuig 2017, ang Mayor nag-isyu og usa ka Executive Order No. 11 sa pagpakusog pa sa educational assistance program sa LGU-Davao ug modawat pa og daghang mga estudyante kinsa gustong magtuon sa balaod.

Ang mga estudyante nga mokuha'g kursong medicine mamahimo sab nga mo-apply sa maong programa. (Jeepy P. Compio/CIO)