DUHA hangtud tulo pa ka bagyo ang mosulod sa Pilipinas karong bulana, Nobyembre 2022, tungod panahon na sa Amihan, matud pa sa Philippine Atmospheric, Geophysical and Astronomical Services Administration Davao (Pagasa-Davao).

Sa paghinabi uban sa Davao City Disaster Radio, gisulti ni Lolita Binalay, chief meteorological officer sa Pagasa, nga ang maong mga bagyo mosuldo sa Philippine Area of Responsibility karong bulana, usa kanila mao si "Rosal".

"Northeast naman gud ang hangin, hanging Amihan na so ang mga bagyo sa last quarter during the northeast season is pababa, iyahang cloudiness ug ang distribution sa iyahang rainfalls tungod sa pabor sa hanging Amihan sa eastern part," pag-esplikar ni Binalay.

Sayo niini, ang Dakbayan sa Davao nakasinati og low pressure area (LPA) gikan sa nahabiling tropical storm nga Queenie nga naa sa 420 kilometros sa sidlakan sa General Santos City nga miresulta sa hinay ngadto sa kasarangan nga mga pag-ulan ug pagpanalugdog.

Matud sa Pagasa nga ang Davao Region naapektuhan sa LPA ilabi na sa mga kasubaan naglakip sa mga sapa sa Davao Oriental, Davao del Norte, Davao de Oro, Davao del Sur, ug Davao Occidental.

Nagpahimangno ang Pagasa sa mga Dabawenyo kinsa nanimuyo sa kabukiran ug sa mga ubos nga lugar nga kinahanglan alerto sa posibleng mga pagbaha.

Samtang giawhag ni Binalay ang Dabawenyos nga mamati sa mga katikaran gikan sa Disaster Risk Reduction and Management Council sa mga risgo sa LPA nga ihatud sa Davao Region.