COTABATO CITY -- Patay ang tulo ka menor de edad human giingong nahilo sa gikaon nga isda alas 5 sa hapon niadtong Martes, Agosto 25, 2020.

Giila ang mga namatay nga sila Sammer Mataya, 12, iyang mga igsuon nga sila Fahad, 10, ug Turon, upat ka bulan, molupyo sa Barangay Karim, Buldon, Maguindanao Province.

Lain pang unom sa miyembro sa ilang pamilya ang gihatud ngadto sa ospital.

Sumala kang Dr. Elly Elona, municipal health officer sa Buldon, nga sayo pa lang sa buntag mipalit og isda nga tayang ang inahan sa mga biktima sa merkado publiko sa Buldon ug giluto ug maoy gipaniudto sa pamilyang Mataya.

Pipila ka gutlo ang milabay, nakasinati na ang tibuok pamilya og grabeng kasakit sa tiyan, nagsuka-suka ug nagkalibanga.

Gipangdala dayon ang mga biktima ngadto sa Parang Maguindanao District Hospital apan ang tulo ka bata namatay samtang ang laing unom gibalhin ngadto sa Cotabato Regional and Medical Center (CRMC) sa Cotabato City.

Namahayag si Elona nga posibleng sa isda o kaha sa tubig nga giinom sa mga biktima ang hinungdan sa ilang pagkahilo.

Padayon pa ang imbestigasyon sa Municipal Health Office-Buldon ug Integrated Provincial Health Office-Maguindanao sa tinuod nga hinungdan sa kamatayon sa mga biktima.