NAGTINGKAGOL sud sa prisohan sa Buhangin Police Station ang tulo ka mga lalaki kinsa naaktuhan sa kapulisan nga nagtari og manok sa tugkaran ug nagpustaanay alas 11:40 sa buntag niadtong Martes, Marso 31.

Mga dinakpan nailhang sila Mark June Dacolo Vidal, 32 anyos, CCTV installer; Denmark Tansaon Badiang, 28-anyos, construction worker; ug Francis Neil Gayo, 20-anyos, construction worker sab ug pulos nagpuyo sa Dumanlas, Buhangin.

Sumala ni Police Major Estrello Ramiso, officer-in-charge sa Buhangin PNP, nga ang operasyon bunga sa reklamo sa mga nagpakabana nga katawhan sa dapit.

Giingon sab sa kapulisan nga modakop gayod sila niini gumikan sa ilang gipakusgan nga kampanya sa pagbatok sa ilegal nga sugal.

Nakuha sa ilang posisyon ang duha ka sunoy-igtatari ug ang P300 nga ilang pusta samtang giandam na sa kapulisan ang pagpasaka og kaso batok sa mga dinakpan didto sa korte. (Jeepy P. Compio)