MASULOD ug mabaligya unta sa Davao City ko wala nakumpiska sa awtoridad ang mga ismagol nga sigarilyo Hulyo 2, 2022 didto sa Task Force (TF)-Davao Checkpoint-Sirawan, Toril, Siyudad sa Davao.

Kinarton nga "Dreamon" nga sigarilyo unod ang 599 ka mga pakite nga mokantidad og P299,500 ang naharang sa TF-Davao ug Toril Police Station nga dala sa suspek nga si Ernesto Hugan Jr., 47, taga Purok 4, Barangay Eden, Toril, Davao City.

Sumala ni Captain John Louie Dema-ala, public information officer sa TFD, gawas kang Hugan, nasikop sab ang laing tulo ka mga suspek nga sila Rajiv Radjail, 36, nagpuyo sa Isla Verde, Boulevard, Davao City; Jerhan Sabdani, 34, nga taga Purok Silag, Mandug, Davao City; ug Rasul Sariul, 40, taga Isla Verde, Boulevard, Davao City.

Sakay sa usa ka mini van lulan ang 12 ka mga kahon sa Dreamon nga sigarilyo nga maoy dala ni Hugan, diin sa usa sab ka multicab karga ang 78 ka mga reams sa mga nagkalain-laing illegal nga sigarilyo nga nagkantidad og P39,000.

Gibutyag sa awtoridad nga resulta kini sa ilang makuti ug hugot nga inspeksyon sa mga behikulo nga mosulod sa Davao City.

Karong adlawa, ipasaka ang kaso batok sa mga suspek didto sa korte.