KIDAPAWAN CITY -- Kapin sa 36 ka libo nga mga babaye ang namabdos karon sa panahon sa pandemya sa probinsya sa Cotabato.

Kini ang gikomperma ni Integrated Provincial Health Office (IPHO) North Catabato Chief Dra. Eva Rabaya karong tuiga.

Ang numero misaka gamay kung itandi sa 35 mil sa 2019 sa parehas nga panahon.

Nagpadayon karon ang information education campaign sa IPHO duyog sa serbisyo caravan sa mga hilit nga barangay sa probinsya.

Tumong niini nga matudlo sa mga inahan ang husto nga pag-atiman sa ilang kahimsog samtang nagmabdos.

Gikanayon ni Rabaya nga pipila sa mga hinungdan sa hataas nga pagmabdos sa karon nga pandemya tungod sa daghang mga nanguli ug napugos sa pagpabilin sa ilang mga balay sa gipatuman nga community quarantine.

Mitaas sab sa 13 ang ihap sa maternal death sa probinsya sa Cotabato karong tuiga og medyo mas taas sa napulo ka kaso kaniadtong miaging tuig.

Nagsugyot si Rabaya sa katawhan sa North Cotabato nga sundon ang family planning method aron malikayan nga motaas pa ang ihap sa mga nagmabdos nga mga kababaihan.