PANTUKAN, Davao de Oro -- Upat ka mga giingong miyembro sa Communist-Terrorist-Group (CTG) ang nasikop sa 701st Infantry "Kagitingan" Brigade niadtong Sabado, Agosto 14, 2021 didto sa Sitio Binogsayan, Barangay Napnapan.

Subay sa report gikan sa kasundalohan, nasayran nga nakadawat sila og impormasyon gikan sa mga nagpakabana nga katawhan hinungdan nga gilayon nila girespondehan sa dapit.

Sumala sa mga concerned citizen nga padayon ang extortion ug pagpang-ambush sa mga nahisgutan diin manghasi sab kini sa mga negusyante panahon nga sila mangilkil.

Nakuha sa posisyon sa upat ka dinakpan ang upat ka mga high-powered nga rifle.

Ang upat nadakpan gumikan sa joint-operation sa mga tropa sa 701st IB, 66th IB, Intelligence Units ug sa Philippine National Police isip resulta sa ilang Intelligence Operations sa Davao de Oro.