DATU MONTAWAL, Maguindanao -- Suspendido ang klase sa tulo ka tulunghaan sa lungsod human natigayon ang giyera tali sa duha ka nagkabangi nga pamilya sa halos tibuok adlaw niadtong Martes, Oktubre 15.

Matud ni 602nd Brigade Commander Brigadier General Alfredo Rosario nga sugod alas 5 sa buntag hangtud alas 4:30 sa hapon sa maong adlaw, nagbinakbakay ang duha ka pamilya sa field commander sa Moro Islamic Liberation Front (MILF) sa Barangay Dungguan sa maong lungsod.

Tungod sa kahadlok nga maipit sa kagubot, moabot ngadto sa 500 ka pamilya namakwit ngadto sa luwas nga mga lugar.

Mga eskuwelahan nga gisuspende ang klase mao ang Balogo Elementary School ug Matalam Farm Resettlement Elementary School sa Barangay Dungguan, apil sab ang Mamalimping Elementary School sa lungsod sa Pagalungan.

Mga mga kumander sa MILF nga nagka-engkuwentro mao sila Kumander Butoh Mantol ug Kumander Impar nga gisuportahan sa ilang mga pamilya.

Nahunong lang ang engkuwentro sa diha nga nagpatunga ang mga lokal opisyal sa Datu Montawal, Muslim elders, ug mga lider sa MILF.

Nagpakatag na og puwersa sa militar, uban ang kapulisan sa lungsod nga maoy magbantay sa mga molupyo nga naapektuhan sa kagubot. (Edgar E. Fuerzas)