MIULBO ang grabeng panag-engkwentro sa duha ka Moro fronts alas 7 sa buntag hangtud alas 2 sa hapon niadtong adlaw nga Sabado, Oktubre 5, sa probinsiya sa Maguindanao.

Giila ang mga napatay nga sila Musa Balabagan, Datunaot Mosabil, Mads Balabagan, Kebo Balabagan, Baby Boy Laguiali, Tongan Dimalido ug Pongan Ganda, mga miyembro sa Moro Islamic Liberation Front (MILF) Task Force Itihad.

Upat sab ang nakabsan sa kinabuhi ug tulo ang naangol sa Bangsamoro Islamic Freedom Fighters (BIFF) ilawom sa grupo ni Shiek Esmail Abdulmalik alyas Kumander Abu Toraife.

Sa taho gikan sa Maguindanao Police Provincial Office nga nagka-engkwentro ang puwersa sa MILF Task Force Itihad ug BIFF sa Sitio Tinolusan, Barangay Dasawao, Shariff Saydona Mustapha, Maguindanao.

Gikomperma sab ni Barangay Dasawao Barangay Chairman Abdulracman Kanda nga daghanang mga sibilyan ang mihikling sa utlanan nga parte sa Shariff Saydona Mustapha ug Pikit North Cotabato.

Mismo ang mga sibilyan ang nakakita sa mga nangamatay sa MILF nga gisakay sa mga Bangka sa Rio Grande de Mindanao pagawas Sitio Tinolusan sa Brgy. Dasawao, sa Shariff Saydona Mustapha.

Nabalaka si Kapitan Kanda nga posibling mokatag ang kagubot gumikan nahiabot na sab ang dugang puwersa MILF Task Force Itihad.

Kabahin sa kasabutan sa Joint Adjoc Action Group sa gobyerno ug MILF nga magtinabangay kini sa pagpuhag sa mga dautang pundok ilabina ang mga terorista.

Sa kasamtangan, nag-apud-apod na og hinabang ang LGU-Shariff Saydona Mustapha sa mga bakwit nga sentrong naapektuhan sa kagubot. (Edgar Fuerzas)