KIDAPAWAN CITY -- Personal nga away ang motibo sa pagpatay sa usa ka lolo alas-8 sa gabii, Dominggo, Hulyo 22, 2019.

Giila ang napatay nga si Roberto Calabroso, 72, minyo, molupyo sa Barangay Singao sa dakbayan.

Gibutyag ni Kidapawan Chief of Police Lieutenant Colonel Joyce Birrey nga naglakaw lang ang biktima pauli sa ilang balay gikan nagpalit og tabako sa tindahan, apan gi-atngan siya sa suspek nga si Ronie Balutias.

Sumala pa nga nagkalalis una ang duha gumikan matud pa sa bangi nila sa utlanan sa yuta.

Tungod sa kasuko, kalit lang gihulbot ni Balutias ang iyang dala nga sundang ug kutsilyo diin iyang gitigbas ug gidunggab ang biktima.

Daling niikyas ang suspek human makita nga nahagba ug naligo sa kaugalingong dugo si Calabroso.

Gikatakda nga pasakaan og tukmang kaso ang suspek.