TAGUM CITY -- Personal nga bangi ug ang kalambigitan sa trabaho ang gitan-aw karon nga anggulo sa kapulisan sa pag ambush-patay sa usa ka abogada.

Ang insidente nahitabo alas 8:30 Lunes sa buntag, Septyembre 24, sa Purok Gabayan 1 Manga, Barangay Mankilam, Tagum City.

Ang Police Regional Office (PRO)-Davao nag-ila sa biktima nga si Connie del Rio Villamor, 38, ug residente sa Purok Pag-asa, Barangay Visayan Village.

“Personal grudge, work-related or some motives that will arise depending on the evidence gathered,” sulti ni PRO-Davao spokesperson Chief Inspector Milgrace Cajes Driz.

Ang biktima nagmaneho sa iyang itom nga Subaru Forester XT nga sakyanan nga dunay plaka numero ADP-3141 gikan Manga Elementary School padung Apokon Nationa Highway.

Kalit mi-overtake ang usa ka motorsiklo ug namusil ang angkas niini sa makadaghang higayon nga maoy hinungdan sa kamatayon sa biktima.

“The investigators are still digging deeper to the investigation and further urged witnesses to come out and report to the police,” dugang ni Driz.

Padayon ang imbestigasyon sa kapulisan sa hitabo. (Jeepy P. Compio)