NANGAGUBA ang pipila ka mga balay ug mga cottages human gikuso-kuso sa kusog nga balud ang baybayon daplin sa Libuganon, Tagum City niadtong Dominggo, Hulyo 15.

Makita sa mga hulagway nga na-post sa Facebook nga nangaguba ang mga payag hinungdan nga namakwit ang mga residente.

Kahinumdoman niadtong 2006 susama ang nahitabo sa Barangay 23-C, Isla Verde, siyudad sa Davao diin liboan ka mga pamilya ang namakwit human gipangguba ang ilang kabalayan.

Gisundan kini sa tuig 2012 diin gipanglampurnas sab ang mga balay sa Isla Verde ug sa Barangay Matina Aplaya.

Tungod niini, ang Philippine Atmospheric, Geophysical and Astronomical Services Administration (Pagasa) Davao ug ang Office of the Civil Defense (OCD)-Davao nagpahimangno sa katawhan nga gilayong mamakwit kung masinati ang dagkong mga balud.

Sumala sa Pagasa-Davao nga matag bulan sa Hulyo, Agosto ug Septyembre sagad mohapak ang dagkong mga balud sa mga baybayon sa Davao gulf dala sa Hanging Habagat.

Hinuon, nangandam na ang matag barangay labi na sa mga barangay daplin sa dagat sa Davao City diha sa ilang pag-rescue sa mga residente ugaling masinati na ang dagkong mga balud.