STA. CRUZ, Davao del Sur -- Nasikop sa kapulisan ang usa ka construction worker kinsa gitudlong suspek sa pagpanunggab sa babayeng menor de edad didto sa Sitio Bitaug, Barangay Zone 4, alas 6:00 sa gabii, Dominggo.

Ang dinakpan nailhang mao si Nico Yamson Miroy, 35, minyo, molupyo sa lugar.

Si Senior Inspector Mary Grace Martinez, hepe sa kapulisan nag-ila sa biktima nga mao si Joy (tibuok ngalan gitago), 15, tinun-an ug silingan sa suspek.

Matud ni Martinez nga nagtindog lamang ang biktima sa pultahan sa ilang balay dihang miagi ang suspek nga lango sa ilimnong makahubog ug way daghang rason, giduslak og kutsilyo ang menor de edad.

Apan, maayo na lang nakabantay ang biktima ug nasagang niini ang hinagiban mao nga sa iyang walang parte sa palad nasamdan.

Sa pagresponde sa kapulisan, nasikop ang suspek ug gilayong gipadlak sa ilang selda dungan sa pagduso og tukmang kaso batok kaniya. (Orlando B. Dinoy)