COTABATO CITY -- Talandugon ang kahimtang sa usa ka 23 ka adlaw pa nga pangedarong masuso human mahulogi og bunga sa durian alas 5:30 sa hapon, Huwebes, Agosto 9.

Samtang samdan ang iyang inahan nga si Janna, molupyo sa Malabang, Lanao del Sur.

Gisaysay ni Janna nga nanghigda sila sa iyang anak sulod sa ilang balay sa dihang kalit lang mihapak ang kusog kaayong hangin sa ilang lugar.

Wala damha nga uban sa paghapak sa hangin, natagag ang duha ka bunga sa durian sa balay sa mag-inahan ug nilusot sa atop nga gama lang sa nipa.

Giingong ang usa ka bunga natagag sa likod sa inahan samtang ang laing usa ngadto sa ulo sa bata.

Daling gitabang ni Janna ang iyang anak bisan samaron siya ug gihatud ngadto sa Malabang District Hospital.

Apan tungod kritikal ang kahimtang sa bata, gibahon siya sa Ozamiz City Hospital.

Sa pagsuwat ning balita Biyernes, nanawagan ang pamilya sa bata nga tabangan sila sa operasyon sa ilang anak gumikan kay pobre sila ug way sarang kuwarta nga magamit.