GIKALISANG sa mga sibilyan, ilabi na sa kabataan, ang panagbugno sa banakon ug sawa alas 4 sa hapon niadtong Huwebes, Oktubre 8, 2020, sa Barangay Balite, Magpet, North Cotabato.

Mismo ang mga molupyo sa Sitio Natayukan sa nahisgutang barangay ang nakakita sa sawa ug banakon nga nagpinahitay.

Daling gipahibawo kini sa mga molupyo ngadto sa mga barangay opisyal, ilabi na gyud sa purok leader.

Daling nagresponde ang uban pang mga molupyo sa Sitio Natayukan nga nagbitbit og mga mahait nga sundang ug gitabangan nila og tigbas ang nagbugno nga mga halas hinungdan nga namatay.

Kahinumdoman nga daghan na nga mga molupyo sa mga lungsod sa Magpet, Makilala, Arakan, Antipas ug Kidapawan City ang namatay human gipahit sa banakon, ilabi na kadtong nanimuyo sa tiilan sa Mount Apo.

Nagpasidaan ang mga lokal nga opisyal sa probinsiya ngadto sa mga molupyo nga dili mokompiyansa sa mga halas nga manggawas sa ilang lungga.