EPEKTIBO ug misunod gayod ang mga residente sa Barangay 23-C Isla Verde, Davao City sa gipatuman nga lockdown sa Department of Health (DOH) ning siyudad aron makubsan ang kaso sa coronavirus disease (Covid-19) sa Poblacion area.

Sa Davao City, ang Barangay 23-C ang dunay taas nga kaso sa Covid-19, hinungdan nga kini ang nahimong unod sa meeting sa DOH uban ni Davao City Mayor Sara Duterte-Carpio.

Sabado sa hapon, gipatuman ang barangay lockdown diin mismong Facebook page sa Barangay 23-C ang nagpahibalo ngadto sa katawhan.

Dangtan og usa ka oras gikan sa pagsugod sa lockdown, daw nahimong ghost town ang dapit.

Sa Facebook post ni Allyson Mier, iyang gipakita pinaagi sa hulagway didto sa Purok 5-A nga wala gyuy tawo nga naglakaw sa kalsada.

Duna kini kapsyon nga, “ATM: Brgy 23-C Hard Lockdown, under 14-day Quarantine. NO WORK NO Sari-Sari na mag-open. Tanan balay naka closed, every blocks/corners naka closed.

"Strictly follow Stay at Home. Police, Task force, Army ang nakabantay sa tanan areas. With my family, safe pa naman and kaloy-an makaabot unta ang FOODS for many days na naka Quarantine. So, Help us Lord,” sa kapsyon ni Mier.

Kagahapon sa hapon, gisulayan pagkuha sa Superbalita ang kabahin ni Barangay 23-C Kapitan Alimoden “Wating” Usman labot sa proseso ug pamaagi sa paghatud og mga pagkaon sa kabalayan apan wala pa kini kahatag og higayon sa iyang bahin.