CENTRAL MINDANAO -- Gituohan nga ang mga komentaryo sa Bombo Radyo General Santos City nga pasirad-an ang Kabus Padatuon (Kapa) Community Ministry International Incorporated ni pastor Joel Apolinario maoy motibo sa pagpaarak sa ilang istasyonan alas 8:30 sa gabii, Miyerkules, Hulyo 3.

Sa taho sa kapulisan sa General Santos City Police Office, nasayran nga usa ka pick-up truck, kolor pula nga gimaneho sa wala mailhing tawo, ug dunay mga sakay, nagpaarak sa ilang armas tumong sa istasyonan nga nahimutang sa Barangay Bula.

Hinuon, abtik nga nakabawos ang mga sekyu sa istasyon hinungdan nga nisibat ang mga suspek.

Walay naangol sa mga empleyado sulod sa istasyon gawas lamang sa mga igo sa salamin sa pultahan nga milapos sa recording room.

Daling niresponde ang mga sakop sa Bula Police Station ug daling gihugtan ang seguridad palibot sa broadcast center.

Kahinumdoman nga grabeng gibatikos sa station manager sa Bombo Radyo General Santos City nga si Jonathan “Janjan” Macailing ug kanhi news director nga si Salvador “Boy” Galano ang Kapa.

Si Macailing ug Galano nadakpan sa entrapment operation sa National Bureau of Investigation (NBI) ug kapulisan human gi-akusahan nga nangilkil sa Kapa niadtong milabay nga tuig apan gipanghimakak kini sa duha.