MAGUINDANAO -- Positibo ang tubag sa Bangsamoro Islamic Freedom Fighters (BIFF) sa pahayag sa Bangsamoro Transition Authority (BTA) nga andam nilang dawaton ang mga gitumbok nga "peace spoilers" sa Bangsamoro Autonomous in Muslim Mindanao (Barmm).

Gibutyag ni Abu Misri Mama, tigpamaba BIFF Bungos faction, nga girespeto nila si Barmm Interim Chief Minister Alhaj Murad Ebrahim kung ugaling makig-istorya kini kanila.

Matud ni Mama nga sa diha nga nagsugod ang negosasyon sa Moro Islamic Liberation Front (MILF) ug gobyerno alang sa Bangsamoro Organic Law (BOL), wala na sila manghilabot sa gibarugan niini.

Gikanayon ni MILF Vice chairman ug defunct Bangsamoro Transition Commission chairman Gahdzali Jaafar nga andam ang Barmm nga dawaton ang mga peace spoilers susama sa BIFF ug mga Isis-inspired groups kung ugaling sila mosurender.

Kini ang pasalig ni Barmm Interim Chief Minister Murad aron mapursige ang kalinaw ug kalambuan sa Mindanao.

Gipasalig sab ni Murad nga ipadayon ang implementasyon sa mga proyekto sa kanhi Armm nga napundohan na ug gitakda nga ipatuman karong tuiga.

Apan giklaro sa militar nga ipadayon nila ang paglutos sa BIFF nga nagsige gihapon og hasi sa probinsiya sa Maguindanao. (Edgar E. Fuerzas)