MATANAO, Davao del Sur -- Nalipay ang mga binilanggo sud sa Matanao Municipal Police Station dihang gi-sorpresa sila sa mga sakop sa Divine Mercy Apostolate gikan sa St. Michael Parish sa lugar adlaw’ng Lunes, Abril 12.

Gibutyag ni Major Rhuel Barachina, hepe sa kapolisan, nga nagdala og paniudto ang mga sakop sa relihiyosong organisasyon diin dungan nangaon ang mga piniriso human nahatag ang ilang bahin.

Dugang ni Barachina nga mihatag sab og mensahe ang grupo ngadto sa mga piniriso nga di mawad-an og paglaum ug gi-ampoan nga matabangan sa ilang giatubang nga kaso.

Sagad sa mga piniriso ang makasinati og depresyon sud sa kulungan ilabi pa nga tagsa ra silang maduaw sa ilang pamilya gumikan sa hulga sa pandemya. (Orlando B. Dinoy)