NASIKOP na sa kapulisan ang suspek sa paglugos sa menor de edad nga tulo ka bulang buntis sa Purok 9, Manuel Guianga, Tugbok District, Davao City.

Ang suspek mao si Archie Caralos Quibol, 39 anyos, laborer, residente sa Purok 9, Manuel Guianga, kinsa dunay duha ka ihap sa kasong lugos sa korte.

Atol sa Oplan Kalinaw sa Davao City Police Office (DCPO), malampusong nasikop ang suspetsado subay sa warrant of arrest nga gipagula ni Presiding Judge Dante Baguio sa 11th Judicial Region, Regional Trial Court (RTC) Branch 12.

Sumala ni Police Major Ricky Obenza, hepe sa Tugbok Police Station, nga tulo ka bulang mabdos ang biktima dihang gipanamastamasan sa suspek niadtong Abril 10, 2018 ug nasundan pa kini niadtong Abril 18, 2018 samtang ang biktima gisugo og suka.

“Lisod kayo. Unsa nalang kaha ang bation sa bata [biktima] nga nagpakatawo sa iyang anak nga wala’y amahan diin kaduha pa gyud niya nasinati ang pagpanamastamas sa iyaha,” saysay ni Police Major Obenza subay sa journal sa DCPO.

Balhog na karon ang suspek sa selda sa Tugbok Police Station kinsa nakatakda nga ibalhin sa Davao City Jail.

Ang suspek gikonsiderang top 5 most wanted person sa DCPO.