USA ka konsehal sa Davao City nagduso sa "Clean as You Go" (CLAYGO) policy sa dakbayan aron sa pagdasig sa Dabawenyos aron nga manghinlo sa ilang kalat sa mga restaurant lakip na ang pagpraktis sa pag-segregate sa mga basura.

Gisulti ni Konsehal Diosdado Mahipus Jr. sa paghinabi kaniya sa Davao City Disaster Radio niadtong Nobyembre 10, 2022, nga nagpanikad na siyang mapaila ang CLAYGO sa mga establisemento kon diin nagserbisyo og mga pagkaon sa dakbayan aron pag-awhag sa Dabawenyos nga magpraktis og kalimpyo.

"Ang uban man gud wala pa sila kabalo anang clean as you go. Sa laing nasud ing-ana man, mas mahal mokaon pag diha ka sa restaurant kay nagbilin ka og hugaw unya ikaw ra pud dapat manglimpyo diha sa imohang hugaw," matud niya.

Hinuon giklaro ni Mahipus nga di kini ipatuman sa tanang mga food services sama sa "dining restaurants". Punting niini ang mga food services nga dunay mga "disposable" nga basura.

"Kung mahimo sa atong mga kaigsuonan, kita na ang mo-segregate ana ug maglabay sa basurahan. Dili kay naa tay plastic gigamit, ato ra pud ibilin sa lamesa, dili na siya nindot, dapat makatabang ta, it's a manifestation of our kagustohan na protektahan atoang environment," pagklaro ni Mahipus.

Bag-ohay lang nag-viral sa Facebook tungod sa CLAYGO policy sa resort apan mga nag-abang mibiya lang nga wa manglimpyo sa ilang kalat ug miingon nga nagdali sila ug kapoy na sa paghimo niini.

Dugang pa niya nga matag usa kinahanglan nga magpraktis og kalimpyo ug badlungon kadtong mobiya lang nga wala manglimpyo sa ilang hugaw.