GOOD news gumikan subling gibalik sa People's Park ang Covid-19 vaccination gikan alas 8 sa buntag padung alas 3 sa hapon, gikan sa mga adlaw'ng Lunes hangtud Biyernes.

Kini ang gibutyag ni Davao City Covid-19 Task Force Spokesperson Dr. Michelle Schlosser nga ang People's Park vaccinations gibalik na sukad atong Enero 16, 2023.

"Last week pa, Monday, nagsugod ta. We'll keep doing that activity hopefully for a very long time," sumala sa opisyal atol sa Covid-19 Alert Program sa 87.5 FM Davao City Disaster Radio (DCDR), Miyerkules, Enero 25.

Ang opisyal niingon nga ang pagpabalik sa Covid-19 vaccination sa People's Park nagtumong sa pagtubag sa singgit sa kadaghanan sa mga Dabawenyo tungod kay ang uban naglisud sa pagpangita sa ilang mga district health offices.

Niya pa nga kon naa sa People's Park ang Covid-19 vaccination, dali na lang alang sa uban nga gikan sa ilang mga trabahoan.

Gibutyag sab ni Schlosser nga anaa pa sa ilang mga paghisgot kung abli ba ang Covid-19 vaccination sa maong parke sa adlaw'ng Sabado ug Dominggo.

"Sige lang paningkamutan nato na sa CHO, Covid-19 Task Force, and City Government of Davao na maalibyuhan nang mga reklamo. We are working on it, rest assured lang gyud na ang atong tumong mapabilis and mas maging accessible atong services, especially sa Covid-19 vaccination sa atong katawhan," ingon sa opisyal.

Giingon sab ni Schlosser nga ang mga grupo sa pagbakuna sa Covid-19 sa People's Park nagsilbi sa primary two-dose series, booster shots, ug kadtong mga missed doses alang sa pediatric population 5-anyos ngadto 17-anyos ug kadtong mga 18-anyos pataas.

Gipahimangnoan kadtong first-time vaccinees nga mag-enroll or mo-register sa SafeDavao QR (https://profiles.safe-davao.com/) nga usa sa mga mandatory requirement.

Ang mga Pediatric vaccinees, mopresentar lang og proof of age, sama sa birth certificate o di kaha school ID.

Gikan Enero 16 hangtud 22, 2023, ang Davao City nakatala og kinatibuk-ang 67 ka aktibo nga kaso kon diin dunay upat nga namatay nga kadaghanan wala nabakunahan.

Gisubli ni Schlosser nga ang COVID-19 anaa pa sa palibot tungod kay magpamatuod niini ang mga namatay kinsa mga nagpositibo sa virus. (JPC/CIO)