NAG-OPERATE na ang crematorium sa Davao City diin ang ginaserbisyohan una niini mao ang mga biktima sa coronavirus disease (Covid-19) sa dakbayan.

Sa Special Hour sa 87.5 Davao City Disaster Radio, kagahapon, gibutyag ni Davao City Mayor Sara Duterte-Carpio nga nag-operate na ang crematorium nga ang prayoridad sa serbisyo mao kadtong mga namatay sa Covid.

"Finally, nag-operate na ang atong crematorium. Sa karon, ang gina-accomodate lang nato is all Covid-19 cadavers," tipik sa pamahayag ni Mayor Sara.

Gidugang niini nga pagkahuman sa pandemya, tanang namatay sa bisan unsa nga matang sa sakit ug disgrasya mamahimo nga maserbisyohan sa Davao Crematorium.

"Once mahuman na ang atong pandemic, then all kinds of cadavers [na], referred to us for cremation," niya pa.

Giingon sab niini nga libre ang cremation ngadto sa mga namatay sa Covid.

"Yes. Free ang cremation [for Covid-19]," dugang sa mayor.

Una niini gibutyag sa mayor nga mogasto og P30,000 ang kada usa nga i-cremate diin ang bayad sagubangon sa lokal nga kagamhanan ning siyudad subay sa badget sa Bayanihan To Heal As One Act II.

Ang Davao City Covid-19 Operations Center dunay mga hotline numbers sa Globe Calls Only: (0927) 604 5797 Text Only: (0906) 367 4671; sa Smart Calls Only: (0919) 071 1111 Text Only: (0939) 340 5675 Telephone: (082) 244- 0181.