DILI na African Swine Fever (ASF) free ang Davao City, kini human makompirma nga nakasud na sa dakbayan ang maong kagaw.

Sa press conference nga gihimo sa City Hall of Davao, Huwebes, Pebrero 6, gisulti ni Ricardo Oñate Jr., director sa Department of Agriculture-Davao, nga subay sa gihimong laboratory test sa mga baboy, kini nagpositibo sa ASF.

Kagahapon, miguwa ang report nga daghang baboy gikan sa Barangay Domina ug Barangay Lamanan sa Calinan District ang nangamatay.

Mga molupyo ug namuhi sa mga baboy nabalaka sa hitabo maong dali silang midangop sa gobyerno aron masubay ang hitabo.

Subay sa gihimong test sa unom ka baboy gikan sa Barangay Lamana ug Dominga, tulo niini nagpositibo sa ASF.

Ang mga blood samples sa namatay nga baboy daling gipadala sa Regional Disease Diagnostic Laboratory-Soccsksargen sa General Santos City aron masubay dayon ang resulta.

Nauna nang nanganti ang local government unit sa Davao City nga "ASF-free" ang dakbayan, diin gimuntar ang nagkadaiyang lakang aron makontrola ang pagsud sa kagaw dinhi.

Sa pikas bahin, ang Department of Health (DOH) nauna nang nagsulti nga di risgo sa panglawas sa tawo ang ASF.

Una nang gisulti ni DOH Secretary Francisco Duque III nga basta ang karne napalit sa kasaligang tinubdan ug giluto kini og maayo, luwas kini nga kaunon.

Suma sa World Organization for Animal Health, ang ASF "severe and highly contagious viral disease among domestic and wild pigs."

Ang baboy nga na-infect sa ASF virus makasinati og hilanat, depresyon, di ganahan mokaon, magpula ang dalunggan, tiyan ug tiil, magsuka-suka, magkalibanga nga moresulta sa kamatayon.

Sa kasamtangan, wa pay bakuna alang ASF.