GIPAKLARO sa Davao City Police Office (DCPO) nga wa maluya ang kapulisan luyo sa mga panghitabo nga dunay taxi driver nga gipatay, dunay gipusil udtong tutok sud sa balay ug ning ulahi, usa ka 16-anyos nga babaye ang gipusil-patay sab samtang nagbaklay.

Sumala ni DCPO spokesperson Senior Inspector Ma. Theresita Plaza-Gaspan nga wa matulog ang kapulisan, inay naningkamot kini aron mapatunhay pa ang kahusay ug kalinaw sa dakbayan.

"Usa lamang kini sa mga isolated cases, ug wala ni siya nagpasabot nga naluya kita. In fact, gipakusgan pa nato ang atong static deployment sa mga lugar nga sagad nanggihitabo ang krimen," sulti ni Gaspan.

Nasulti sa DCPO nga isolated cases ang maong mga panghitabo gumikan nalahi kini ug dili matawag nga makaalarma.

"Sa pagkakaron, considered as isolated cases pati ang kaso sa taxi driver nga gipatay kay medyo remote ang motive of hold-up, kay naa ang iyang cellphone, wallet ug kuwarta, naa pod siyay kasong lugos two years ago," ingon ni Gaspan.

Ang pagpusil-patay sa menor de edad gisubay sab ang anggulo sa pagpangawat niini ug kuwarta ug ang love triangle hinungdan nga posibleng gibalsan kini samtang ang gipatay udtong tutok sa Catalunan Grande posibleng personal nga bangi ang hinungdan sa krimen.

Sa kasamtangan mas gipakusgan pa sa kapulisan sa DCPO ang ilang monitoring labi na nga dunay mga dapit sa tulo ka distrito ning siyudad nga gideklarang area of concern karong May 14, 2018 elections.