TEMPORARYONG sirad-an ang Davao City Recreation Center (DCRC) ngadto sa publiko tungod sa himuong 60-adlaw nga rehabilitasyon sugod Sabado, Hunyo 10, 2023.

Sa Facebook post Hunyo 9, gisulti sa lokal nga panggamhanan sa Davao City nga ilang palambuon ang mga pasilidad sa recreation center. Tanang kalihukan sa gambalay sulod sa 60-adlaw ikanselar.

Gisulti ni City Economic Enterprise (CEE) officer-in-charge Maximo Macalipes nga ang renobasyon mokantidad og gibana-bana nga P2.5 milyon ubos sa Annual Development Fund 2022 gikan sa badyet sa siyudad.

“Mag-cover siya atong ceiling and electrical works, like rewiring sa center sa atong gym, floor tiles, and floor painting works pud,” tug-an ni Macalipes sa paghianbi uban ang SunStar Davao.

Sa pagkakaron, ang pagpalapad wala pa malakip sa kasamtangan nga badyet alang sa renobasyon, apan ikonsidera kini, tataw ni Macalipes.

“Seguro in the near future, amo pud to siyang i-consider, but for now ang ma-provide nato is ang enhancements pa lang sa facilities,” esplikar sa opisyal.

Sa miaging panahon, ang DCRC nihimo na og mga renobasyon sa "huddle area" alang sa mga magduduwa gamit ang gymnasium, comfort rooms, ug floor court paintings.

Sa gymnasium gihimo ang mga piniling mga paugnat sa kusog ug isports sa siyudad. Gigamit sab kini aron himuon ang "home games" sa Alab Pilipinas, nabungkag nga basketball team nga nagduwa sa Asean Basketball League sa miaging 2017.

Sa samang tuig, nihimo sab og renobasyon ang gym.